Back to Top

نزلت الشارع

الجمعة, 02 تشرين1/أكتوير 2015 01:09 كتبه  مارڤل الحمامي

"البنـت ملهــاش غيـر بيتــها وجوزهــا".. الجملة اللي نزلت سمــاح حمــدي الشارع ..  سماح حمدي مهندسة شابة وموهوبة في مجال الفن التشكيلي وخلاص قربت على مناقشة رسالة الماجيستير بتاعتها اللي هي مبسوطة وفرحانة بنفسها وهي بتخلصها... بس طبعاً عشان احنا مجتمع رجعي واعذروني اني بقول كدة بس هي ديماً الحقيقة بتوجع. كل اللي حواليها شايفينها تافهة وفاشلة عشان لسة مجوزتش وإن كل اللي بتعمله ده مالوش أي لازمة... وطبعاً دى كانت أكتر جملة سمعتها "البنت ملهاش غير بيتها وجوزها" ومن هنا قررت عشان تفهم الناس ومامتها إن مش أهم حاجة الجواز .. نزلت الشارع ولبست فستان فرح  لفت بيه البلد كلها راحت قعدت في كافيه و راحت المترو عشان توصل لهم اعتراضها على أفكارهم  وإن مش لازم نجاحها يبقى جوازها .. وممكن تنجح بشهادتها.. سماح مش الوحيدة اللي بتتعرض للمواقف دي.. لأ ده في كتير وكل واحدة فينا بتتحط كل يوم في فكرة إن البنت ملهاش غير بيتها وجوزها .. بس بصراحة سماح كان عندها الشجاعة انها تواجه وتقولهم إن النجاح مش جواز والفشل يعني طموح البنت.
وفجأة النجاح والفشل  بقى بيتقاس بإن البنت متجوزة ولا لأ..!! لكن لأ هما مالهومش علاقة بانتي حققتي إيه في حياتك وفي طموحك ومعاكي شهادات إيه... ولو في يوم قابلتي حد فرحان بنجاحك ومبسوطلك أوي بعد كل الشكر في انك شاطرة وإن طموحك عاجبه هايرجع بعدها لنقطة يللا بقى عايزين نجوزك ونفرح بيكي.. وهنا بيجيلك رد طبيعي جداً جواكي هو حضرتك كل الشكر اللي كنت بتشكره في ده إنت ماكنتش فرحان وحاتفرح بس لما أتجوز..؟؟ بصراحة سؤال كل مرة بيجي ف دماغ أي بنت بتقابل الموقف ده ومش بنلاقي إجابة مقنعة لنفسنا غير إن هو ده مجتمعنا.
المجتمع اللي بيحكم على البنت انها ممكن تتعلم بس الشئ الأساسي هو الجواز وكأن ده هدف لازم توصل له ولو ماوصلتلوش يبقى يا حرام هي أكيد عندها مشكلة..! لكن مش ممكن تكون مش لاقية الشخص اللي يقدرها ويعيشها ملكة ذي ما هي عيشة ف بيت أبوها (معنوياً مش مادياً) .. المجتمع اللي بيشجعها إنها تذاكر وتنجح بس خلي بالك عشان مش أي حد هيرضى يتجوز واحدة معها شهادات أكتر منه... وكأنها بقت عيب مش ميزة إن البنت تبقى ناجحه في حياتها العملية..!!
"عفواً أيها المجتمع الرجعي" نجحنا و فشلنا مش بيتقاس بالجواز والفستان الأبيض والفرح. نجحنا وفشلنا بيتقاس بي أنا .. وصلت لإيه فى حياتي وحققت إيه في طموحي .. مش إتجوزت وأنا عندي كام سنة؟