Back to Top

إنتو بتشتموني ليه؟

الأربعاء, 30 كانون1/ديسمبر 2015 22:13 كتبه  مارڤل الحمامي

مارڤل الحمامي

"إنتو بتشتموني ليه؟ عيب كده أنا معملتش حاجة عشان البهدلة دي ولا هو إنتو ذي ما الي قبلي قاله انكو بتشتمونا كلنا في الاخر...!!" تفتكروا مين الي بيقول الجملة دي....؟؟ أقولكم أنا مين الي بيقول الجملة دي..  "2015"... أيوة أنا قصدي على السنة دي، أصلي بصراحة شايفة كل الناس عماله بتشتم فيها وعايزنها تخلص وشايفة إن دي مش أول مرة تحصل احنا كل سنة على نهايتها الناس بتقعد تشتم في السنة, فبصراحة الموضوع صار إستفزازي جيدا أصل مش معقول يعني كل السنين فيها مشاكل.!

ركزت كده و اكتشفت أن المشكلة مش في السنه دي ولا في الي قبلها ولا حتى في الجاية، عارفين المشكلة فين؟ المشكلة فينا إن احنا الى عايزين نحسس نفسنا إن الأيام والسنين جاية علينا لكن الحقيقة إن احنا الى بنيجي على نفسنا. معلش تعالو نحسبها مع بعد وحدة وحدة كدة.. إنت عايز تقنعني إن إنت عدى عليك 365 يوم إنت زعلان فيهم, طب بلاش عايز تقنعني إن إنت مجالكش أي خبر كويس السنة دى... طب بلاش كل دة عايز تقنعني إن إنت طول السنة ولا مرة ابتسمت يا سيدي مش ضحكت حتى لو مش من قلبك .احنا بنكدب الكدبة ونصدقها وبنلوم على الايام. لأ أقف كده مع نفسك و واجها.. مش الأيام ولا السنين هي الي بتيجي عليك إنت الي بتيجي على نفسك.. و مش السنة الي وحشة إنت الي مش عايز تشوفها حلوة.

ده كفاية إن في ناس مستنية نهاية السنة أكتر ما هي بتفكر تعيش وتمبصت في أخر كام يوم في السنة. أنهي مبدأ دة الي بيقول اني استنى نهاية  حاجة وأنسى أعيش فترة في حياتي لمجرد اقتناعي إن السنة لازم تخلص و ان الايام لازم تعدى, طب ما هى كده مش هتعدى. صدقوني لما بسمع جملة السنة دى لازم تخلص أول حاجة بقولها في بالي "بس تخلص على خير.." عارفين ليه بقول كده...؟ عشان طول محنا شايفين إن السنة وحشة هتفضل أيامنا كمان وحشة .

إنهاردة مش وحش وامبارح مش أوحش و السنة دى مش وحشة  و الي فاتت مش اوحش... لأ إنهاردة حلو و بكرة أحلى و السنة دي حلوة و الجاية أحلى. خليك ديماً مقتنع إن إنت المتحكم الوحيد في حياتك وانك انت بس الي تقدر تخلي السنين حلوة وإنت الي تقدر تخلي في كل سنة في ذكرى حلوة ليك تفتكرها بيها. بص ديماً على نص الكوباية المليان وسيبك من النص الفاضي لأن عمر ما الكوباية هتتملي على الأخر يبقى نبص ونركز على النص المليان ونفرح بي ونقدره مع نهاية كل سنة اشكرها.. اشكرها على الحاجات الحلوة إلي عجبتك فيها وعلى التجارب الوحشة الي اتعلمت منها..   متطلبش من السنة الي جاية انها تبقى أحلى.. ساعد نفسك انك إنت الي تبقى أحسن  وساعتها بس حتشوف كل السنين أحلى.