Back to Top

بالورقه و القلم..

الجمعة, 14 تشرين1/أكتوير 2016 18:23 كتبه  مارڤل الحمامي

 

أي قرار صعب في حياتنا بيحتاج نفكر فيه علشان ناخده.. لكن الحب مش قرار والمشاعر مش ورقه وقلم وإنك تفكر في شخص ويشغل دماغك ده مش بمزاجك. الحب إحساس بتحس  بيه إتجاه شخص مش علشان هو الشخص المثالي من وجهة نظرنا… لأ لكن علشان لما بتحب حد بتحبه زي ما هوكده، طلع وحش طلع كويس إنت بتحبه، بتحبه بعيوبه قبل مميزاته لأن إنت نفسك عندك عيوب وممكن تكون أكثر وأسوأ من عيوبه.

فرق كبير أوي بين إنك تقرر تحب حد بعيوبه وبين إنك قررت تدخله في اختبارات قبل ماتحبه والاثنين بعاد كل البعد عن بعض، مع إن الاثنين قرارات.. بس واحده إنت حبيت حد زي ما هو والتانيه إنت دخلت في حياته بس لسة بتاخد قرار إنك تدخله في حياتك. بس عارفين فين المشكلة اللي بجد...؟ المشكلة إنك بتشوف شخص من وجهة نظرك وبالورقة والقلم هو كويس وفيه كل المميزات الي إنت عايزها للشخص الي هاتكمل معاه بقيت حياتك فبالتالي حضرتك بتاخد القرار إنك تدخل جوه حياته وتدخله جوه حياتك وبعد فترة بتكتشف إن نفس الورقة والقلم بيقلولك إن الشخص ده مش هو اللي إنت بتحلم بيه... و ده كله ليه!!! علشان الورقة والقلم ينفعوا في مسألة حسابية في رسمة هندسية لكن مش في مشاعر طالعة وداخله مش في شخص بتفكر تكمل معاه حياتك.

وبعد ما بنعدي بأول مرحلة بندخل في تاني مرحلة أو أصعب قرار  و هو "الجواز" و ده لبعض الناس أصعب قرار.. لأن ببساطه إنك تتخيل نفسك هاتكمل حياتك كلها مع الشخص ده!!! وقتها بس هاتدور في مخك كل الاسئلة اللي ماتخليكش تاخد القرار ده.... زي هو أنا فعلاً ده الشخص اللي أنا عايزه؟ طب هو فعلاً مناسب ليا؟ طب هو إحنا حانعيش إزاي مع بعض... حياتنا حاتبقي سهلة ولا صعبة؟ طب ولو حصل مشكلة هانعمل فيها إيه؟ وكمية أسأله توصلك في الأخر إنك مستحيل تاخد القرار بس فعلاً صدقني كل الأسئله دي مش هاتبقي موجودة غير في حالة واحده بس هي إنك تبقى حبيت اللي قدامك بجد. لأن ساعتها بس هاتفهم إن أي مشكلة هاتتحل قدام حبك ليه و حبه ليك.

قبل ماتدّخل حد في حياتك وقبل ماتحّسِبها بالورقة والقلم هل الشخص ده ينفعك ولا لأ.. ومميزاته كويسة ولا لأ... وعيوبه  هل يا تري إنت تقدر تستحملها..؟ لأن مفيش حد من غير عيوب، قبل كل ده يا ريت بس تعرف نفسك الأول وتعرف إنت عايز إيه. وهل إنت جاهز إنك ترتبط دلوقتي وحاتبقي فعلاً قد المسؤلية ولا إنت مش قد الخطوة دي و غير مجهز ليها. لأن بجد في أوقات كتير بتبقى المشكلة فينا إحنا مش في حد تاني وبنبقى إحنا اللي محتاجين الورقة والقلم لنفسنا مش للي قدامنا.