Back to Top

حاجة تحزن

الأحد, 04 كانون1/ديسمبر 2016 14:26 كتبه  مارڤل الحمامي

إرحمنا يا رب.... محتاجة تفسير!!!!!! يعني إيه أفتح الفيسبوك علي خبر بيقول إغتصاب كلبة من شخصين... هو ده بجد...؟! الأول عديت الخبر لأن قلبي وجعني، وبعدين ماقدرتش، رجعتله تاني حسيت إن فضولي هايموتني  و عايزه أفهم إيه اللي حصل  و يمكن يكون عنوان الموضوع غلط ولا حاجة...!! وياريتني ما فتحت ولا قريت...  خبر حقيقي "كلبة إتعرضت لإغتصاب جنسي عنيف من بني أدمين.." و أول كلمة جت في دماغي بني أدمين إيه إحنا ولا حاجة إحنا أسوأ كائنات عايشه على وجه الارض.. إيه اللي إحنا وصلنا له ده !!! إنعدام ضمير و مشاعر وأحاسيس.. إنعدام إنسانية!! يعني لما بنسمع عن إغتصاب بنت بقى بالنسبه لنا حاجة شبه عادية وده طبعاً مش عادي بس علشان إحنا في غابة ومافيش عقاب للشخص اللي بيعمل كده بس إنك تقرا خبر "إغتصاب كلبة جنسياً"، محتاجة حد يفسرلي ده إيه وإحنا فين...؟؟

 يلا مين هايطلع بقى يدافع عن الرجاله الجامدين اللي عملوا كده وهايجي يقوللي أصل الكلبة كانت ماشيه لوحدها متأخر، ولا لبسها هو السبب، ولا إنها كلبه ماعندهاش أخلاق و ماشيه تترقص ولا إزاي أهلها سايبنها تمشي في شارع ضلمة كده.....؟؟؟ مجتمع رجعي وتعبان في دماغه. إحنا عايشين في غابة وغابة كلها حيونات مفترسة.. (مع الإعتذار للحيوانات) حاجة بقت صعبة، بس لأ.. إحنا مش في غابة إحنا في حاجة أسوأ من الغابة لأن الحيوانات عندهم وفاء و إحساس ومشاعر عننا.

ماسمعش بعد كده حد بيشتم حد ويقول له يا حيوان..  حيوان مين.. ياريت نبقى نص الحيونات... نص إيه ده إحنا حجر.. إحنا ولا حاجة.. وفي نفس اللحظه الي كنت بقرأ فيها الخبر جه في مخي مشهد كنت شفته من شهور كتير أوي وحسسني أد إيه إحنا معدومين الإحساس والدم... "وأنا مرٌوحه بالليل وفجأة لقيت مجموعة كلاب ملمومه حوالين شيئ.. أنا ماقدرتش أفسره غير لما قربت وإكتشفت إن الحاجة دي كلب ميت وبيحاولوا يبعدوه عن نص الشارع علشان العربيات مادوسش عليه.. وكل لما عربية تيجي وماتهديش يطلعوا يجروا وبعدين يرجعوا يحاولوا يزقوه بعيد. ما هذا الوفاء و الإخلاص و الشهامه!!! وطبعاً كان في كمية رجاله بصراحة واقفين بيتفرجوا على المشهد ده... و ولا واحد إتحرك و تعاطف مع الموقف وراح شال لهم الكلب، كلهم واقفين بيتفرجوا فقط . و مش محتاجة أقول إني كنت هاتجنن وأنزل أساعد الكلاب لكن طبعاً علشان أنا بنت وعلشان كنت لوحدي خفت أنزل بس أكيد ماخفتش من الكلاب خفت من الرجالة...!!

طب إحنا كبنات كنا بنخاف نمشي في الشارع علشان ماحدش يضايقنا ولما بنمشي في الشارع بنحاول نخلي بالنا على قد مانقدر علشان إحنا عايشين وسط رجالة مريضة نفسياً، طيب دلوقتي نعمل إيه في الكلاب اللي في الشارع..؟! إيه كل يوم هانسمع عن إغتصاب كلبة..؟؟ زمان كنا بنخاف علي نفسنا من كلاب الشارع دلوقتي بنخاف على كلاب الشارع من رجالة الشارع...!! حاجة تحزن بصراحة علي حالنا اللي وصلناله ..